سيكولوجية الالوان بتساعد على اتخاذ قرارات شرائية افضل

هل عمرك سألت نفسك ليه كل محلات الوجبات السريعة زي ماكدونالدز وإين-إن-أوت برجر بتستخدم أحمر وأصفر؟
وليه محلات الماركات الغالية بتلجأ للأسود والدهبي؟ الموضوع ده مش صدفة، ده علم اسمه سيكولوجية الألوان، وهو السر اللي بيخلي علامات تجارية كتير ناجحة ومميزة.

الالوان ليها تأثير كبير على مشاعرنا وتصرفاتنا، وبتأثر على قرارات الشراء بتاعتنا، لدرجة إن في أبحاث بتقول إن 90% من الانطباع الأول عن أي منتج أو براند بييجي من لونه، وإن الألوان ممكن تزود الوعي بالعلامة التجارية بنسبة 80%.
يعني اللون اللي بتختاره مش مجرد ديكور، ده جزء أساسي من استراتيجية التسويق بتاعتك.

الألوان بتعمل إيه بالظبط؟ 

-بتثير المشاعر: اللون الأحمر مثلاً بيخليك تحس بالحماس والاستعجال، عشان كده بتلاقيه كتير في يافطات التخفيضات والعروض.
أما الأزرق فبيدي إحساس بالثقة والأمان، عشان كده معظم البنوك وشركات التأمين بتستخدمه.

 -بتأثر على تصرفاتنا: عمرك لاحظت إن زرار “اشترِ الآن” أو “سجل دخول” بيكون بلون لافت زي الأخضر أو البرتقالي؟ ده عشان الألوان دي بتشجعك تاخد خطوة وتدوس على الزرار.

 -بتحدد شخصية البراند: الألوان اللي بتختارها بتعرف الناس على شخصية شركتك في ثانية.
البراندات المرحة والشبابية بتستخدم ألوان فاتحة وصريحة، أما البراندات الرسمية أو الفخمة فبتستخدم ألوان غامقة زي الكحلي والرمادي.

 -بتحسن التعرف على البراند: تخيل ستاربكس من غير اللون الأخضر بتاعها، أو ماكدونالدزمن غير الاصفر والاحمر.
الألوان بتخلي البراند مميز وسهل تتعرف عليه، سواء شافته في يافطة في الشارع أو على السوشيال ميديا.

كل لون وليه حكايته كل لون ليه تأثير نفسي مختلف، واستخدامك ليه بيوصل رسالة معينة للعملاء.

الألوان المشهورة ومعانيها:

-الألوان الدافية:
الألوان دي بتجذب الانتباه وبتثير مشاعر الحماس والفرحة والبهجة، زي الأحمر والأصفر والبرتقالي.

الأصفر: لون الشمس والفرحة والتفاؤل، وهو أسرع لون بيجذب العين،
ماكدونالدز بتستخدم اللون ده مع الأحمر عشان تدي إحساس بالسعادة والشباب، وتفتح الشهية.

 الأحمر: لون القوة والعاطفة والحماس، بيخلق إحساس بالاستعجال، عشان كده بيستخدموه في الإعلانات والعروض.
شركة كوكاكولا بتستخدمه عشان تدي إحساس بالطاقة والإثارة.

 البرتقالي: لون مبهج ومبتكر ومناسب للشركات اللي عايزه تبان ودودة ومرحة.
قناة نيكلوديون (Nickelodeon) بتستخدمه في اللوجو بتاعها عشان يعبر عن محتوى البرامج المليان إبداع ومرح.

-الألوان الباردة:
الألوان دي بتدي إحساس بالهدوء والراحة والثقة، وبتخلي الناس تاخد وقتها في التفكير، زي الأزرق والأخضر والبنفسجي.

 الأزرق: أكتر لون الناس بتحبه في العالم. بيدي إحساس بالثقة والأمان والولاء.
ده سبب إن كتير من شركات التكنولوجيا وشركات التأمين والبنوك بتستخدمه.

الأخضر: لون الطبيعة والنمو والأمان. هو الخيار الأول للشركات اللي ليها علاقة بالصحة أو المنتجات الصديقة للبيئة.
في نفس الوقت، ممكن يدي إحساس بالثبات والنجاح، عشان كده بعض شركات التمويل بتستخدمه.

البنفسجي: زمان كان لون الملوك والنبل، عشان كده لسه بيدي إحساس بالفخامة والابتكار.
براندات كتير بتستخدمه عشان تدي إحساس بالتميز.

-الألوان المحايدة:
الألوان دي أساسية وبتضيف لمسة من الأناقة والرقي، وبتخلي الألوان التانية تبرز أكتر.
الأبيض: لون النقاء والبساطة والحداثة، بيستخدموه في كل حاجة عشان يخليها تبان نظيفة وأنيقة، زي منتجات شركة آبل.

الأسود: لون القوة والفخامة والرقي، كتير من البراندات الغالية بتستخدمه عشان تدي إحساس بالجودة العالية والحصرية، زي نايك وشانيل.

 الرمادي: لون محايد ومناسب لكل الأذواق، بيدي إحساس بالاحترافية والثبات، وممكن يتدمج مع أي لون تاني عشان يعمل تصميمات مختلفة.

نصائح للمسوقين:

-اسأل الجمهور بتاعك: شوف الألوان اللي بتعجبهم وبتشدهم، ممكن تعمل استطلاع رأي بسيط عشان تعرف إيه الألوان اللي بتعبر عن براندك من وجهة نظرهم.

-بص على منافسيك: شوف هما بيستخدموا ألوان إيه وحاول تختار ألوان مختلفة عشان تتميز عنهم.

 -متخافش تجرب: ممكن تخرج عن المألوف وتعمل مزيج ألوان جديد ومختلف زي ما عملت “هيلاري ويس” (Hillary Weiss) لما دمجت الأحمر والأزرق والأصفر عشان تبين إن البراند بتاعها مبتكر وغير تقليدي.

باختصار، اختيار الألوان المناسبة لبراندك مش رفاهية، ده استثمار مهم بياثر على كل تفصيلة في رحلة العميل معاك.

لو عايز تقرأ Blogs أكتر تقدر تزور المدونة او صفحتنا على facebook