استراتيجية صناعة المحتوى هي المفتاح!

المحتوى بيلزم له استراتيجية مخططة عشان يتم انتاجه بطريقة مناسبة لكل براند، لأن الاستراتيجية هي اللي بترشدك للطريق اللي هتقدر من خلاله تحقق أهدافك وتصنع محتوى قوي، وهي المفتاح اللي بيأكدلك ان المحتوى اللي بتنشره هيتشاف.

باختصار استراتيجية المحتوى هي إنك تعمل محتوى صح، للمستخدم الصح، في الوقت الصح، وبالطريقة الصح.

وفي عناصر لازم تتبعها كصانع محتوى عشان تقدر تقدم محتوى قوي ومناسب للبراند.

العناصر دي هي:

1- البريف (Brief): وده اول واهم حاجة في أي استراتيجية تسويقية، ولازم تجاوب فيه على عدد من الأسئلة عشان تقدر تخطط صح.
والاسئلة بتعرفك مين هو العميل، ايه هو المنتج او الخدمة اللي بيقدمها، وايه وضع السوق، ومين هو الجمهور المستهدف، ومين المنافسين.
لما تقدر تجاوب على الأسئلة دي هتبقى خطيت اول واهم خطوة في صناعة استراتيجية المحتوى.

2- العصف الذهني (Ideation): هو الخطوة اللي بنقعد نفكر فيها ونقول افكارنا وتساؤولاتنا، وإيه المواضيع اللي الناس بتتكلم عنها دلوقتي، وإيه اللي المنافسين بيعملوه وإزاي ممكن نتميز عنهم، وازاي نوصل الرسالة اللي عايزينها بطرق مختلفة.

3- شخصية العميل المثالي (Persona): هي ببساطة صورة خيالية بس مفصلة جداً لعميلك أو جمهورك المثالي.
الشخص ده اسمه إيه؟ بيشتغل إيه؟ سنه كام؟ ساكن فين؟ إيه اهتماماته وهواياته؟ وإيه المشاكل اللي بيواجهها في حياته أو في شغله؟ طب إيه اللي بيدور عليه وبيحلم بيه؟ وانهي نوع المحتوى اللي بيحبه وبيستهلكه؟
باختصار، الـ Persona بتخليك تفكر بعقلية عميلك، وتصنع محتوى كأنه معمول مخصوص ليه هو، وده بيزود فرص إنه يتفاعل معاك ويتحول لعميل فعلي.

4- المنافسين (competitors): مهم احدد المنافسين في السوق من نفس المجال، وايه نقاط القوة والضعف اللي عندهم، وبيتميزوا عني في ايه، وانا بتفوق عليم في ايه؟

5- توزيع المحتوى (content distribution): وهي اللي بتخليني افكر ايه الـplatforms اللي عليها الجمهور المستهدف بتاعي واللي انا هستخدمها، بمعنى ان المحتوى اللي هينزل على الفيسبوك هيكون مختلف عن اللي هينزل على برنامج اكس بسبب القيود على عدد الكلمات في برنامج اكس.

6- الـKPIs & Analysis: وهي اختصار لـKey Performance Indicators.
عشان تعرف إذا كنت ماشي صح ولا لأ، لازم تقيس نتايجك، وده بالظبط دور الـKPIs  والـAnalysis  في استراتيجية المحتوى.

-ايه الفرق بين الـKPIs و الـAnalysis؟

الـKPIs هي المقاييس اللي بتستخدمها عشان تعرف هل المحتوى بتاعك بيحقق الأهداف اللي حاطتها ولا لأ وهي أرقام محددة بتقولك الأداء ماشي إزاي.

الأرقام دي بتختلف على حسب هدفك من المحتوى ان كان مثلا:

-زيادة الوعي بالبراند، عدد مرات الظهور، مدى الوصول ، عدد المتابعين، او عدد المشاركات

-اما الـAnalysis  (التحليل) هي ببساطة إنك تبص على أرقام الـ KPIs دي وتفهم معناها.

-الأرقام لوحدها ملهاش لازمة لو مش فاهم ليه الرقم ده طلع كده، وإيه اللي المفروض تعمله بناءً عليه.

-مرحلة التحليل دي بتجاوب على أسئلة زي:
ليه المحتوى ده جاب تفاعل كبير؟ هل عشان الموضوع كان مهم؟ ولا عشان الصورة كانت جذابة؟
او ليه المحتوى ده مجابش نتيجة؟ هل الجمهور مكناش مهتم بالموضوع؟ ولا كان فيه مشكلة في التوزيع؟

–خطوات أساسية للتحليل:

1-استخدام أدوات زي  Google Analytics، تحليلات السوشيال ميديا، أو لوحة تحكم موقعك عشان تجمع أرقام الـ KPIs بتاعتك.

2-مراجعة الأرقام: بص على الأرقام بانتظام (أسبوعي، شهري، ربع سنوي).

3-المقارنة: قارن أداء المحتوى بتاعك بالشهور اللي فاتت، أو بالمنافسين، أو بالأهداف اللي إنت حاططها لنفسك.

4-استخلاص النتائج  (Insights): هنا بتفهم الأرقام دي معناها إيه.

5-اتخاذ الإجراءات: بناءً على النتائج اللي طلعت بيها، بتاخد قرارات وتعديلات في استراتيجية المحتوى بتاعتك.

الخلاصة، الـKPIs  هي اللي بتقيس بيها مستوى أداء المحتوى بتاعك، والـ Analysis  هو اللي بيفسر مستوى الاداء وبيقولك تعمل إيه عشان تتحسن.

الاتنين مع بعض هما اللي بيخلوك دايماً بتطور استراتيجيتك وبتوصل لأحسن نتايج ممكنة.

في النهاية، نقدر نقول إن استراتيجية المحتوى مش مجرد كلام نظري، دي بقت ضرورة أساسية لأي حد عايز ينجح في عالم التسويق الرقمي.
من أول ما تحدد أهدافك وتفهم جمهورك، لغاية ما تعمل عصف ذهني لأفكار المحتوى، وتعرف منافسينك بيعملوا إيه، وتختار أفضل طريقة لتوزيع المحتوى، ولحد ما تقيس النتائج وتحللها باستخدام الـKPIs  والـ Analysis؛ كل خطوة من دول بتكمل اللي قبلها عشان توصل لهدفك.