في عالم الأعمال اللي بيتغير بسرعة رهيبة والشركات الناجحة مش بتعتمد على الحظ ولا التخمين لازم تعتمد على أبحاث السوق وأبحاث التسويق.
علشان تقدر تنافس وتكسب ثقة العملاء لازم تعرفهم كويس وتعرف السوق والاتجاهات وتاخد قرارات مبنية على معلومات حقيقية.
وهنا ييجي دور أبحاث السوق (Market Research) وأبحاث التسويق (Marketing Research) ورغم إن المصطلحين بيتقالوا كتير كأنهم نفس الحاجة لكن في فرق مهم بينهم وكل واحد فيهم له دور أساسي في نجاح أي شركة.
الفرق بين أبحاث السوق وأبحاث التسويق
– أبحاث السوق (Market Research)
دي بتدور حوالين السوق نفسه وحجمه والمنافسين والعملاء المستهدفين واتجاهات السوق والفرص المتاحة.
يعني بتركز على البيئة الخارجية اللي الشركة بتشتغل فيها.
– أبحاث التسويق (Marketing Research)
دي أشمل من أبحاث السوق وبتغطي كل عناصر المزيج التسويقي (المنتج، السعر، التوزيع، الترويج).
يعني ممكن تشمل دراسة رضا العملاء عن منتج معين أو اختبار حملة إعلانية جديدة أو تحليل تسعير منتج معين.
ببساطة
أبحاث السوق = ندرس فين؟
أبحاث التسويق = ندرس إزاي؟
ليه الأبحاث دي مهمة للشركات؟
من غير معلومات دقيقة قرارات الشركة ممكن تكون مبنية على فرضيات غلط.
مثلاً، شركة تطلق منتج جديد في منطقة مفيهاش طلب عليه أو تعمل حملة إعلانية مش مناسبة للجمهور المستهدف وده بيكلف وقت وفلوس ومجهود بدون نتيجة.
- أبحاث السوق بتساعد الشركة إنها تدخل السوق الصح وفي الوقت الصح بالمعلومات الصح.
- أبحاث التسويق بتخلي الشركة تقدر تفهم سلوك العملاء وتحسن المنتج وتضبط الرسائل الترويجية وبالتالي تحقق نتائج أفضل.
التكنولوجيا غيرت اللعبة
زمان كانت الأبحاث بتاخد شهور وبتتكلف مبالغ ضخمة.
دلوقتي التكنولوجيا خلت جمع وتحليل البيانات أسرع وأسهل وأدق وأدوات زي Google Trends ووسائل التواصل الاجتماعي وBig Data دي خلت الشركات تقدر:
- تراقب سلوك العملاء في الوقت الحقيقي
- تعمل استبيانات رقمية وتجمع آلاف الردود في وقت قصير
- تحلل ردود الفعل على المنتجات أو الحملات في السوشيال ميديا
- تستخدم الذكاء الاصطناعي لتوقع الاتجاهات المستقبلية
ازاي الشركات بتستخدم الأبحاث دي لصالحها؟
- تطوير المنتجات:
أبحاث التسويق بتكشف رأي العملاء في المنتج فيتم تحسينه أو تعديله بما يناسبهم.
- تحديد الجمهور المستهدف:
أبحاث السوق بتساعد على تحديد الشريحة الأنسب لاستهدافها بناءًا على السن والموقع والاهتمامات وغيرهم.
- تحسين الحملات الترويجية:
من خلال اختبار الإعلانات قبل إطلاقها وتعديل الرسائل عشان تكون أقرب للجمهور.
- الدخول لأسواق جديدة:
أبحاث السوق بتقلل من المخاطرة عند التوسع عن طريق دراسة طبيعة السوق والمنافسة والطلب.
أمثلة حقيقية لاستخدام الأبحاث في النجاح
كتير من الشركات العالمية والمحلية حققت نجاح ضخم بفضل اعتمادها على أبحاث السوق والتسويق.
على سبيل المثال شركة “كوكاكولا” دايمًا بتستخدم أبحاث تسويقية لاختبار المنتجات الجديدة قبل نزولها وبتحلل آراء المستهلكين في كل سوق على حدة.
كمان شركات زي “أمازون” و”نتفليكس” بتعتمد على تحليل سلوك العملاء (Marketing Analytics) علشان تقدم توصيات مخصصة وتزود معدلات الرضا والشراء.
أما في السوق المحلي بنلاقي شركات ملابس أو مطاعم بتستخدم استبيانات على السوشيال ميديا لمعرفة رأي العملاء في الخدمة أو تختبر مناطق معينة قبل التوسع فيها.
الأمثلة دي بتوضح إن النجاح مش صدفة لكنه نتيجة لاعتماد على معلومات دقيقة ناتجة عن أبحاث منظمة ومدروسة.
في النهاية الشركات اللي بتعتمد على أبحاث السوق وأبحاث التسويق بشكل مستمر عندها فرصة أكبر للنجاح والثبات وسط المنافسة.
ومع تطور التكنولوجيا بقى الوصول للمعلومة أسهل من أي وقت واللي يقدر يستخدمها صح هو اللي يكسب.
فسواء كنت صاحب مشروع صغير أو شركة كبيرة متخليش قراراتك تعتمد على الصدفة خليها دايمًا مبنية على بحث وفهم وتحليل.
