وظائف مهددة بالإنقراض

وظائف مهددة بالإنقراض

في وظائف كتير في حياتنا مانقدرش نستغني عنها ، أو زي ما كنا فاكرين إننا مانقدرش نستغني عنها 

و مع تطور التكنولوجيا الوظائف دي بتنقرض تدريجياً 

و زي ما التكنولوجيا ساعدتنا و وفرت علينا كتير جداً و ساعدتنا في إنجاز حاجات كتير في يومنا و في حياتنا العملية و الإجتماعية 

زي ما برضو أثرت علينا و أثرت علي وظائف كتيرة بالسلب و أدت لإنقراضها تدريجياً 

تعالي أقولك أثرت علي أنهي وظايف و خليتها مهددة بالإنقراض 

1- الصحافة الورقية 

الصحافة الورقية هي من أول الوظائف و الأشياء إللي إنقرضت تدريجياً بسبب تطور التكنولوجيا 

عايزك تفكر كده في آخر مرة جبت فيها جرنال و قرأته كان من إمتي ؟ 

هتلاقي الكلام ده من مدة طويلة جداً و يكاد يكون منعدم 

و ده لأن دلوقتي أي حد عايز يعرف الأخبار أو يدور علي شغل أو حتي يشوف صفحة الوفيات ، بيعمل ده بكل سهولة من موبايله و هو نايم علي سريره كمان 

و ده بيرجع لتطور التكنولوجيا زي ما قولتلك 

2- التاكسي 

كان زمان أسهل و أسرع وسيلة مواصلات لأي حد مستعجل هي التاكسي 

لحد ما ظهر علينا حاجة من قريب إسمها Uber 

إيه يا جدعان Uber ده ، هو برنامج بتنزله علي موبايلك تقدر تطلب منه عربية تجيلك لحد عندك و تاخدك توديك مشوارك 

مع العلم إن العربية دي حديثة مش قديمة و في نفس الوقت سعر المشوار أقل من سعر التاكسي العادي 

طبعاً في الأول Uber مانتشرش غير بين الشباب بس 

لأن ماكنش حد متطمن ليه ، لحد ما بقي كل الفئات العمرية بتشستخدمه و غطي تماماً علي التاكسي و لحد دلوقتي نادراً لما تلاقي حد وقف تاكسي و راح بيه مشوار 

و غالبا لو عمل كده بيبقي مش معاه باقة علي الموبايل يطلب بيها Uber مش أكتر 

3- المُزارع 

الفلاح المزارع إللي إتعودنا عليه و درسناه كمان في المدارس و إحنا صغيرين للأسف قرب ينقرض 

و ده لأن أساليب الزراعة تطورت مع تطور التكنولوجيا 

و إللي حل محله ماكينات متطورة هتنجز شغله إللي كان بيشتغله و أزيد كمان في وقت قليل 

فيؤسفني أقولك إن حتي أبو إردان مش هيلاقي حد يصاحبه بعد الفلاح ما ينقرض للأسف 

4- الكاشير 

عارف إن كل طلاب تجارة هيزعلوا مني لما أقولهم إن حتي وظيفة الكاشير إللي كانت آخر أمل لطالب التجارة هتنقرض 

و ده لأن من بعد وباء الكورونا و تبادل العملات الورقية كان من ضمن مسببات إنتقال العدوة بين الناس 

فالتعامل بعد كده هيكون بالبطاقات البنكية أو بمعني أصح بالفيزا ، و الفيزا كانت موجودة قبل الكورونا اه بس ماكانتش منتشرة أكتر من العملات الورقية 

بس وباء الكورونا غير حاجات كتير جداً و مبادئ كتير و خلانا نفكر تاني من أول و جديد في كل حاجة 

و كانت من ضمن الحاجات إللي فكرنا فيها من أول و جديد هي وظيفة الكاشير 

هتقولي طيب ما ممكن يكون الكاشير موجود و أدفع بالفيزا برضو 

هقولك دايماً تطور التكنولوجيا بيبقي هدفة إنجاز الشغل و راحة الإنسان 

علشان كده تطور التكنولوجيا خلي الدفع من الموبايل أصلاً و إنت في بيتك ، و ده أسهل و آمن أكتر كمان 

دول كانوا وظائف من ضمن الوظائف المهددة بالإنقراض و إللي مش هنشوفها خالص في حياتنا قريب جداً للأسف 

تابعنا علي صفحتنا علشان تعرف كل جديد

Leave a Comment

Your email address will not be published. Required fields are marked *